“We will stand up every time human life is threatened; when the Sacredness of Life before birth is attacked; when a child is described as a burden. We will stand up and proclaim that they are worthy of love, care and respect.”- Pope John Paul II

Idineklara ng United Nations ang taong 1979 bilang International Year of the child. Sa kabila ng deklarasyong ito, ang karapatan ng mga unborn children ay ipinagwa-walang bahala pa rin. Dahil dito, sa mga pananalita noon ng yumaong Pope Jonh Paul II, itinuon ang kanyang pansin sa mga karapatan ng mga batang hindi nabibigyan ng pagkakataon na maisilang: ang kanilang karapatan upang mabuhay.

*****

Kamakailan, idineklara ni P/Insp. Marites Aradanas na hahabulin niya at hindi lulubayan ang mga abortionists sa lungsod ng Dagupan. Walang pinipiling oras at panahon, basta’t nakakita ng pagkakataon tiyak may operation laban sa kanila na kadalasan ay positibo ang resulta.

Biyernes ng gabi, sa utos ni P/Supt. Sonny Versoza, chief of police ng Dagupan City, nagsagawa ng operation ang unit ni Aradanas.

Napakalakas ng ulan at hangin, ngunit hindi nag-atubili ang operating unit ni Aradanas na magsagawa ng entrapment operation laban sa isang 62 anyos na babae na isang abortionist daw.

Positibo ang operation at tiklo ang matandang babae. Ang nakapanlulumo lamang ay lumpo at naka-wheelchair pa ang matandang babae.

Naalarma umano ang kapulisan dahil sa natanggap na ulat na marami na itong isinagawang pang-a-abort, pati sa isang 14-anyos na dalagita.

Napakadali rin umanong bumili ng mga gamot na pampalaglag sa matandang ito. Natagpuan sa matandang lumpo ang ilang uri ng tableta na pinaghihinalaang pampalaglag, mga gamot na hindi mabibili sa mga drugstores kung walang kaukulang prescription ng doktor.

“Lumpo hindi ka naawa?” ang tanong ko kay Aradanas.

Mas nakakaawa ang mga sanggol na kinikitlan ng buhay at ni hindi binigyan ng pagkakataon na masilayan ang mundo, sagot ng matapang na hepe ng WCCD ng Dagupan PNP.

Natatandaan ko pa, may isang operation noon na hindi nakayanan ng powers ni Aradanas na arestuhin ang isang abortionist na napalibutan ng kanyang mga anak na maliliit.

Naawa raw siya, marami at maliliit pa ang kanyang mga anak. (mga apo siguro kasi matanda na rin ito.) Pinalampas na lamang niya ito pero sa susunod ay hindi na raw.

Umabot na sa lima ang mga naarestong aborsyonista mula nang ideklara ni Aradanas na hahabulin niya ang mga ito. Maraming buhay ng mga walang kamalay-malay na sanggol ang maililigtas at magkakaroon ng pagkakataong mabuhay. Maraming buhay din ng mga ina ang mailalayo sa peligro at maililigtas sa posibleng kapahamakan.

Nahaharap ngayon ang mga akusado sa iba’t ibang mga kaso. Attempted abortion, intentional abortion at violation of R.A. 2382 kilala sa tawag na Medical Act of 1959 as amended.

Siyanga pala, Sir Sonny, nabanggit ni Insp. Aradanas na inspirado silang magtrabaho dahil na rin sa iyong kakaibang leadership at sa todo suportang ibinibigay mo sa kanila. Don’t you think they deserve commendation, too, sir?